ஈசி சமையல்

புடலங்காய் சிப்ஸ்

தேவையானவை:
விதை நீக்கி வட்டமாக நறுக்கிய புடலங்காய் - ஒரு கப், கடலைமாவு - 2 டீஸ்பூன், அரிசிமாவு, கார்ன் ஃப்ளார் - தலா ஒரு டீஸ்பூன், மிளகாய்த்தூள் - அரை டீஸ்பூன், மஞ்சள்தூள், பெருங்காயத் தூள் - தலா கால் டீஸ்பூன்,
எண்ணெய், உப்பு - தேவையான அளவு.

செய்முறை:

ஒரு அகலமான பாத்திரத்தில் புடலங்காயைப் போட்டு, அதில் அரிசிமாவு, கடலைமாவு, கார்ன்ஃப்ளார், உப்பு, மிளகாய்த்தூள், மஞ்சள்தூள், பெருங்காயத்தூள் சேர்த்து வட்டம் உடையாதவாறு கலக்கவும். லேசாக தண்ணீர் தெளித்தால் போதும். பிறகு ஒவ்வொன்றாக எடுத்துப் போட்டு பொரித்தெடுக்கவும்.

வெண்டைக்காய் மசாலா வறுவல்

தேவையானவை

வெண்டைக்காய் - கால் கிலோ, வெங்காயம், அரிசி மாவு - தலா கால் கப்,
கடலை மாவு - அரை கப், மிளகாய்த்தூள் - ஒன்றரை டீஸ்பூன்,
எண்ணெய் - ஒரு கப், கறிவேப்பிலை - சிறிது,
உப்பு - தேவையான அளவு.

செய்முறை

வெண்டைக்காயை குறுக்கில் இரண்டாக வெட்டி, ஒரு இன்ச் நீள துண்டுகளாக நறுக்கிக் கொள்ளவும். வெங்காயத்தைப் பொடியாக நறுக்கிக் கொள்ளவும். ஒரு பாத்திரத்தில் வெண்டைக்காய், வெங்காயம், கடலை மாவு, அரிசி மாவு, மிளகாய்த்தூள், உப்பு, கறிவேப்பிலை எல்லாவற்றையும் போட்டு சிறிது தண்ணீரை தெளித்து, கெட்டியாகப் பிசறி வைக்கவும். கடாயில் எண்ணெய் விட்டு, அதில் பிசறி வைத்துள்ள வெண்டைக்காயை சிறிது சிறிதாகப் போட்டு வறுத்து எடுக்கவும். மொறுமொறுப்புடன் ருசியாக இருக்கும் இந்த வெண்டைக்காய் வறுவல், இரண்டு நாட்களானாலும் கெடாது...

ஸ்வீட் நட் பூரி

தேவையானவை
கோதுமை மாவு - ஒரு கப்,
நெய் - ஒரு டீஸ்பூன், எண்ணெய் - பொரிக்க,
உப்பு - ஒரு சிட்டிகை.
பூரணத்துக்கு துருவிய தேங்காய் - கால் கப்,
பொடித்த முந்திரி, பாதாம் - 3 டேபிள்ஸ்பூன்,
சர்க்கரை - ருசிக்கேற்ப, விருப்பப்பட்டால் ஏலக்காய்த்தூள் - சிறிது.

செய்முறை
மாவில் உப்பு, நெய் சேர்த்து கெட்டியாக பிசைந்து கொள்ளவும். பூரணத்துக்குரிய பொருட்கள் எல்லாவற்றையும் ஒன்றாகக் கலந்து வைத்துக் கொள்ளவும். பிசைந்த மாவிலிருந்து ஒரு சிறிய உருண்டை எடுத்து கிண்ணம் போல் செய்து அதில் பூரணத்தை போட்டு நிரப்பி, மூடி, பூரியாக இட்டு, எண்ணெயில் பொரித்தெடுக்கவும். 

பீட்ரூட் திரட்டுப்பால்

தேவையானவை:

துருவிய பீட்ரூட் ஒரு கப்,
வெல்லம் 2 கப், நெய் 2 டீஸ்பூன்,
முந்திரி 6, ஏலக்காய்த்தூள் அரை டீஸ்பூன்,
சுக்குப்பொடி அரை டீஸ்பூன்.

செய்முறை:

பீட்ரூட் துருவலை மிக்ஸியில் நன்றாக அரைத்துக் கொள்ளவும். அடி கனமான பாத்திரத்தில் பீட்ரூட் விழுதுடன் சிறிது தண்ணீர் சேர்த்து வேக வைக்கவும். வெல்லத்தைப் பொடி செய்து, சிறிது தண்ணீர் விட்டு, கொதித்ததும் வடிகட்டி, பீட்ரூட் விழுதுடன் சேர்த்து பாத்திரத்தில் ஒட்டாத பதம் வரும்வரை நன்றாகக் கிளறவும். பிறகு சிறிது சிறிதாக நெய் ஊற்றிக் கிளறி, சுருண்டு வந்ததும் இறக்கவும். நெய்யில் முந்திரியை வறுத்துப் போட்டு சுக்குப்பொடி, ஏலக்காய்த்தூள் தூவி பரிமாறவும். 

வெஜிடபிள் இட்லி

தேவையானவை:

இட்லி மாவு - 2 கப்,
பொடியாக நறுக்கிய காய்கறிகள் - அரை கப்,
தேங்காய் துருவல் - 2 டேபிள்ஸ்பூன்,
உதிராக வேகவைத்த பாசிப்பருப்பு - 2 டேபிள்ஸ்பூன், மல்லித்தழை - சிறிதளவு,
உப்பு - ஒரு சிட்டிகை.

தாளிக்க:
கடுகு - அரை டீஸ்பூன்,
உளுத்தம்பருப்பு - ஒரு டீஸ்பூன்,
கடலைப்பருப்பு - 2 டேபிள்ஸ்பூன்,
இஞ்சி - ஒரு துண்டு,
பச்சை மிளகாய் - 2,
கறிவேப்பிலை - சிறிதளவு,
பெருங்காயம் - ஒரு சிட்டிகை,
எண்ணெய் - 2 டேபிள்ஸ்பூன்.

செய்முறை:

கடாயில் எண்ணெயைக் காயவைத்து, கடுகு, உளுத்தம்பருப்பு, கடலைப்பருப்பு, இஞ்சி, பச்சை மிளகாய், நறுக்கிய காய்கறிகள், கறிவேப்பிலை எல்லாவற்றையும் சேர்த்து வதக்குங்கள். பிறகு, தேங்காய் துருவல் சேர்த்து இறக்கி, வேகவைத்த பாசிப்பருப்பை சேருங்கள். இந்தக் கலவையை அப்படியே சூடாக இட்லி மாவில் சேர்த்துக் கலந்து, இட்லித் தட்டுகளில் ஊற்றி வேகவைத்தெடுங்கள். சுவையான வெஜிடபிள் இட்லி தயார்.